Calu la zappa e grapu lu tirrenu, lu votu e lu girìu jurnati sani, e sutta l’acqua o sutta lu sirenu ci zappu oggi, ci tornu ’u ’nnumani. Quantu cchiù soffru, ci suru, ci penu, tantu cchiù la surura si fa pani. Ma ora li simenti si pirdenu, scippati di la terra li viddani. Ad ogni fossa ’n poviru cristianu doppu ca ’a zappa addivintau bicchinu; e lu vùrricu iù ccu li me manu, ora sulu la morti iu simìnu. Addivintau surdatu lu viddanu, Gorizia mmaliritta, chi distinu, li porci grossi supra a lana stanu, è carni capuliata lu mischinu.