U programma do Governu rivoluzionariu

Sta 'mpazzennu lu parrinu
lu patruni si fa lariu
po programma bellu e finu
do governu rivoluzionariu

  co governu rivoluzionariu
  cu travagghia ora cumanna
  e lu riccu e l'agrariu 
  ca si pigghia la cunnanna

La cunnanna si la pigghia
cu non voli fari nenti
e lu riccu chianci e ragghia
ci livamu ' appartamenti

  Li palazzi ci livamu
  non si pava cchiù l'affittu
  tutti pari 'ntettu avemu
  non c'è riccu e derelittu

Non c'è riccu e derelittu
ca u travagghiu c'è ppi tutti
u travagghiu è nu dirittu
ca ppo populu su i frutti

  Ppi lu populu li frutti
  fatti ccu li so sururi
  ca finenu i tempi brutti
  de patruni ora c'è amuri

Sì c'è amuri 'ntra nuatri
cu travagghia è na famigghia
tutti i vecchi su me patri
tutti i fimmini me figghia

  E me figghia va o travagghiu
  li nicuzzi su a jucari
  la maestra ci sta attagghiu
  chista è vita di campari

Di campari chista è vita
non c'è cchiù cu non fa nenti
li parrini e l'industriali
ora azzappunu cuntenti

  E si poi non su' cuntenti
  a zappari stanu u stissu
  gnutti amaru e strinci i denti
  ca lu to distinu è chissu

Chissu senza alternativa
ca lu populu vincìu
vita sana collettiva
non c'è cchiù nè to' e nè miu

  E nè to' e nè miu cchiù c'è
  ca finenu i nostri vai
  non cumanna u riccu o u re
  ma u guvernu 'i l'operai.