Petri

La vara navicava supra spaddi
sulu quattr’ossa e ’n pocu di peddi;
e manu fatti di nozzula e caddi 
occhi scantati comu l’armaleddi.

Occhi chiantati ’n terra, senza celu,
e cori arrisiccati dô duluri 
comu ramagghia pigghiata dô jelu,
senza spiranza cchiù’ d’aviri ‘n ciuri. 

Spavaldi l’assassini a taliari 
braccettu ccu li sbirri e cchê signuri, 
sicuri ca lu munnu ’un pò canciari
a manu ri ’sti quattru zappaturi.

Eppuru ci abbastassi ca nuatri 
ognunu la so petra si purtassi:
ittariccilla all’assassini, ê latri
e sutta raggia e petri ’i cummigghiassi.

Ognunu la so petra, tutti pari, 
spartennusi lu pisu, comu frati;
vadda lu munnu comu po’ canciari: 
ppi sempri li mafiusi vurricati.
 
Ognunu la so petra si purtassi 
ognunu la so petra, tutti pari; 
e sutta raggia e petri 'i cummigghiassi:
vadda lu munnu comu pò canciari.