Comu canciari 'stu munnu

Ora di frunti a tutti li prisenti
chiedu a me figghia una cosa 'mpurtanti
Concetta dimmi si si' 'ntilligenti
comu canciari 'sti munnu birbanti?
Si tu mi duni giustu lu cunsigghiu
ti dicu brava e ti compru un cunigghiu

A la dumanna to' l'appunti pigghiu
e t'arrispunnu senza fari sbagghiu:
s'iddu lu pupulinu fussi svigghiu
canciassi tuttu a colpu de battagghiu
ci voli sulu bona voluntati
di l'upirai e tutti l'affamati

Li to risposti sunnu cannunati
mi lassano li sensi sbalurditi
ma pp'aviri li cosi cambiati
ci volunu chiù populi 'struiti
perciò cantamu 'sti nostri canzuni
ppi' luvari di menzu 'sti patruni

Finalmenti pigghiasti la raggiuni
luvamici a li schiavi 'sti catini
o d'ongi omu facemini un liuni
ppi' scatunarlu contru a li parrini
pirchi monici, preti e patrunatu
su' la ruvina di lu nostru statu

Fatti cunvintu populu affamatu
svigghjiti 'n tempu curri e datti aiutu
svigghjiti sulfataru sfurtunatu
svigghjiti cuntadinu schilitritu
ca quannu tutti saremu svigghiati
putemu aviri paci e libirtati

ca quannu tutti saremu svigghiati
putemu aviri paci, paci e libertà.