Aqua alta

Me la sentivo,
Nina, sui ossi
sta aqua freda che adesso vien su.
Me la spetavo
giorno par giorno
come un pegno, na cambial da pagar.

I xe giorni duri sti qua de novembre,
te par che tuto te vogia magnar.
El mar se ingrosa, el vento no'l smete
e sta piova no te lassa dormir.

Ti pensi note e giorno
“eco adesso la riva”,
ti cori note e giorno
a salvar ste quatro strasse,
pronto note e giorno
che te par quasi na guera
na guera sensa fine che no te lassa sperar.

E po de colpo,
amor, ste sirene
e fora vento
e scuro e piova
e te ritorna 
na vecia paura che ti credevi 
de lassar vint'ani fa.

Cori che l'aqua vien su dal gabineto,
salvemo almanco sti quatro schei de roba.
Varda se i fioi xeli ancora in leto,
lassa che i dorma che no i veda sta miseria.

Ti tiri su tuto,
più presto de na gara,
e po ti resti fermo sula porta a spetar,
ora par ora ti controli sul muro
se la cresse, se la cala
se la resta, se la va.

E varda sta zente
che passa par strada,
i ciapa tuto come un bruto destin.
Ti te ricordi tre ani fa i sigava
adesso par quasi che i se staga a divertir.

Co sta scusa in tre ani, in tre volte,
anca i più duri i se ga abituà.
El mar ne copa e nissun no fa gnente,
ansi me par che i ghe daga na man.

I parla de salvarla sta tera sfortunada
de tirar su tuto, de farghe na diga
e intanto i scava po intèra
se va sempre pèso ma gha basta parlar.

“Dame li stivali Nina, vado via
se ti ga bisogno de mi so al bar”

Vado a farme la solita partia,
ti no pensarghe, prepara da magnar.

lalalalalalalalala